littra a Nanà

Littra a Nanà,

Provessuri sabbenadica,

 

Occhiu di crapa - mi scusassi - mi pari chi avi l’occhiu tanticchia fanzu. Ddruoccu, Vossia dici cca è racarmutisi, sin’ad un certu puntu: che è racarmutisi - cioè - sino a lu nannu di sò nannu e cca iddru si chiamava Leonardo. Ma è propriu accussì, provessu’? Cuminciammu a diri ca lu nannu di so nannu si chiamava Caliddru, Caliddru com’a mia. ’N’talianu, mastro Calogero Sciascia. Si taliammu li libbra ca cci stannu ancora a l’Itria, vidiemmu ca iddu era uno di la mastranza, era piu e divotu e quannu murì, li missi griguriani a l’Itria ci li diciva lu parrinu Peppi Pirrera. Mastru Liddru Sciascia era racarmutisi originali: si marità lu 24 frivaru di lu 1802, sempre a Racarmuto cu na racarmutisa, la figlia di mastru Pasquali Scibetta e di la gnura Lillina Nalbone. Sò pà, nni lu 1802 era già muortu; ma sò matri, nò. Chista era una Alfano e si chiamava di nomu Nucenzia.

E lu patri di lu nannu di sò nannu, cu era? Si chiamava mastru Leonardu Sciascia. Omu ancora cchiù piu di lu figliu. Nzumma, ’un gn’era comu a Vossia, ca ci piaci dire di esseri scumunicato come lu fratacchiuni fra Ddecu.

Era piezzu grossu di la mastranza: zelatore, si firma o miegliu fu lu figlio Cicciu ca si firmà pi iddu e pi sso pà.

Si talia  ’n’antica carta di l’Itria unni si ddicidi pi la bona  morti (ccu li dovuti scongiuri), m’havi a dari raggiuni. ’Un ci l’haiu pi ora ccà ssa carta, ma la prossima vota cci la puortu.

 

Lu patri di lu nannu di sò nannu era anch’iddu racarmutisi, e racarmutisi era lu nannu: mastru Giovanni, sapi chiddu ca si marità, sempri a Racarmutu, cu la figlia di li Scibetta, gnura Anna e ca murì a 68 anni lu 28 di marzu di lu 1766; e fu seppellitu ’ntra la fossa cumuni a S. Franciscu. Faciennuci li cunti, happi a nasciri attorno a lu 1698. Chistu forsi nun gn’era di Racarmuto ma di Giurgenti. Sò pà: mastru Leonardo, maritatu cu la gnura Vicenza Quagliata, era giurgintanu e si nni vinni a Racarmuto ma nni li primi di lu 1700, ddu seculu inzumma chiamatu di li lumi e ca a Vossia pari ca cci piaci assà. Se nun mi cridi, taliassi chi scrivino li parrina di Racarmuto, in occasioni di lu matrimoiniu di lu figliu di ’ssù primu Scascia racarmutisi, lu capostipiti di la sò famiglia:

 

 

 1726 - 29.9.1726: SCIASCIA GIOVANNI M.° del fu m. Leonardo e Vincenza Quagliato vivente olim jugati Civitatis Agrigenti et Parochiae S. Petri, [sposa:] SCIBETTA ANNA.

 

Vossia è sicuru ca lu nannu di sò nannu era nadurisi e si chiamava Nardu, mastru Nardu. ’Un gn’è bberu, provessu. Lu ‘mbrugliaru. Sapi cu era ddru nadurisi? era chiddru ca nni li libra di la matrici è accussì scrittu:

 

../6/1799 Sciascia Giuseppe de' furono Onofrio di Buonpensiero e Giovanna [sposerà]Borzellino Anna di Vincenzo (al presente abitatrice di Buonpensiero) [e figlia di] Maria. Registro degli Sponsabili: pubblic. giugno 1799 - 16,23,24.

 

Lu zzi Peppi Sciascia, nadurisi - iddu sì -, cu la sò famiglia nun cci trasi propriu nenti. M’havi a cridiri provessu’. Mi scusassi e sabbenadica.

 

Liddru Taverna